Demandantes

empresa
SPEG

Programa Retorna Cualifica 2025

A Xunta de Galicia continúa apoiando ás empresas con centros de traballo en Galicia para axudarlles na busca do talento que precisan para facer fronte aos seus retos futuros, ao tempo que se lles dá unha nova oportunidade ás persoas que tiveron que emigrar así como a súa descendencia, para regresar a Galicia e poder desenvolver un proxecto de vida nesta comunidade. Para iso cómpre facilitar que as persoas interesadas en retornar a Galicia dispoñan tanto de información como de formación que lles permita contar cunha oferta de traballo e chegar a Galicia coa garantía da súa inserción laboral. Estes son precisamente os obxectivos do Programa Retorna Cualifica Emprego.

Por iso, a Xunta de Galicia a través da Consellería de Emprego, Comercio e Emigración pon en marcha o Programa Retorna Cualifica Emprego coa publicación da Orde do 29 de novembro de 2024 (DOG núm. 236 do 09/12/24) pola que se establecen as bases reguladoras das subvencións destinadas a realización do Programa Retorna Cualifica Emprego e se procede á súa convocatoria para a anualidade 2025.

A través das entidades beneficiarias das subvencións deberase levar a cabo o desenvolvemento do Programa na súa integridade, é dicir, desenvolverán as accións para permitir o regreso de 200 galegas e galegos menores de 55 anos residentes no exterior e que irá acompañado dun plan personalizado de cualificación e empregabilidade así como de recursos de formación e a formalización do correspondente contrato de traballo, incluíndo axudas económicas para atender as súas primeiras necesidades en Galicia e para facilitar o seu acceso a unha vivienda en aluguer.

Requisitos para participar

Poderán participar as empresas con centros de traballo en Galicia interesadas na contratación de persoas migrantes galegas que participen no Programa Retorna Cualifica Emprego e coas que se comprometan a formalizar o correspondente contrato de traballo.

En todo caso, a modalidade de contratación será a de contrato indefinido a tempo completo ou parcial, debendo neste último caso, garantir un mínimo do 50% da xornada completa.

A empresa deberá formalizar un compromiso de contratación coa entidade colaboradora onde quede recollida toda a información sobre o perfil das persoas a contratar, descrición do posto, número de persoas a contratar, xornada e localización do centro de traballo.

Presentación de compromisos de contratación

As empresas que desexen participar no Programa Retorna Cualifica Emprego deberán cubrir o formulario que figura no enlace seguinte e envialo á Subdirección Xeral de Cualificacións e Capacidades para o Emprego.

Formulario solicitude de postos

Puntos de información

Para obter máis información, ademais da infografía que se pode consultar no enlace seguinte, pódese contactar coa Subdirección Xeral responsable do Programa:

Subdirección Xeral de Caulificacións e Capacidades para o Emprego

Rúa San Lázaro, s/n

15781 Santiago de Compostela (A Coruña)

sx.cualificacions.emprego@xunta.gal

981 546 804

A continuación tes información adicional na infografía explicativa que se ten deseñado para o Programa:Infografía informativa

Para máis información podes acceder ao portal do Programa a través do seguinte enlace:

Portal Retorna Cualifica Emprego

Programa Retorna Cualifica 2025

O Programa Retorna Cualifica Emprego centra o seu desenvolvemento na aposta decidida da Xunta de Galicia por dar ás persoas que tiveron que emigrar, así como á súa descendencia, a oportunidade de regresar a Galicia e poder desenvolver un proxecto de vida nesta comunidade.

Para iso, cómpre facilitar que as persoas interesadas en retornar a Galicia dispoñan tanto de información como de formación que lles permita acadar a posibilidade de contar cunha oferta de traballo e chegar a Galicia coa garantía da súa inserción laboral.

Sendo así, a Xunta de Galicia ten publicado a Orde do 29 de novembro de 2024 pola que se establecen as bases reguladoras das subvencións destinadas á realización do programa Retorna Cualifica Emprego e se procede á súa convocatoria para a anualidade 2025, posibilitando así contar co apoio de entidades xestoras do programa, que serán as entidades que levarán a cabo o seu desenvolvemento na súa integridade.

Para ser entidades xestoras, deberán ser entidades xurídicas privadas que cumpran os requisitos previstos no artigo 10 da Lei 9/2007, do 13 de xuño, de subvencións de Galicia, e que, ademais, reúnan as seguintes condicións:

a) Que carezan de fin de lucro. Considerarase que tamén carecen de fin de lucro aquelas entidades que desenvolvan actividades de carácter comercial, sempre que os beneficios resultantes destas se invistan na súa totalidade no cumprimento dos seus fins institucionais non comerciais.

b) Que teñan plena capacidade de obrar e acrediten a seguinte solvencia económica, financeira e técnica ou profesional, segundo se establece na Orde.

A dita publicación da Orde pódese consultar no seguinte enlace:

Publicación DOG

Accións a desenvolver

As entidades xestoras elixidas desenvolverán as accións previstas nos tres eixes e nos termos que se establecen na Orde, que son os seguintes:

1. Eixe Divulgación e Comunicación

Este eixe ten como finalidade dar a coñecer o programa e as medidas que o integran, e comprende as seguintes accións:

a) Deseño, planificación e xestión de campañas de comunicación do programa (xornadas, foros...) tanto en Galicia como nos países en orixe sendo área xeográfica de referencia e prioritaria os países da Arxentina, O Uruguai, Venezuela, Cuba, O Brasil, Reino Unido, Francia, Alemaña e Suíza, sen prexuízo de que poida atenderse a demanda de calquera persoa que, reunindo os requisitos, poida residir noutro país. En todo caso, as accións de comunicación deberán ter a conformidade previa da Consellería e deberá ter lugar unha no primeiro trimestre de 2025 e outra dentro do segundo trimestre de 2025.

b) Divulgación e difusión do programa a través de diferentes canles e soportes de comunicación para dalo a coñecer e para buscar a implicación do tecido empresarial; en todo caso, calquera acción divulgativa deberá contar previamente coa conformidade da consellería e axustarse ás normas de imaxe corporativa da Xunta de Galicia.

c) Promover as relacións coas entidades e organismos representativos da cidadanía galega no exterior para contribuír ao coñecemento do programa entre a poboación destinataria que poida estar interesada en participar.

d) Contactar coas empresas con centros de traballo en Galicia para detectar cales son os perfís demandados para os postos de traballo que poden ofrecer ao non estar sendo cubertos pola poboación residente actualmente en Galicia e que, polo tanto, están en condicións de ofrecer un contrato de traballo a aquelas persoas participantes no programa que, reunindo os requisitos, están interesadas en trasladarse a Galicia para ocupar ese posto de traballo.

e) Formalización dos compromisos coas empresas interesadas de ofertas de contratos de traballo para seren cubertas polas persoas participantes no programa que reúnan os requisitos e se axusten aos perfís demandados polas empresas e reservándose as empresas a competencia para realizar os procesos de selección habitual.

f) Preseleccionar nos seus países de orixe as persoas interesadas en participar no programa con base nos requisitos establecidos na Orde.

2. Eixe Formación - Cualificación

Este eixe ten como finalidade dotar dos recursos de formación e cualificación necesarios que poidan ser de interese para complementar a cualificación profesional que poida demandar o posto de traballo, deste xeito comprendería as seguintes accións:

a) Diagnose de empregabilidade: partindo da experiencia e formación que posúa a persoa preseleccionada, elaborarase un plan personalizado de cualificación e empregabilidade en que se recollan aquelas competencias e capacidades que poida ser necesario completar cara a obtención do posto de traballo, polo tanto, nese plan personalizado, no que atinxe ao ámbito de formación, poderá comprender diferentes tipoloxías desde formación como se detallan na seguinte letra.

b) Formación/Cualificación:

b.1) Formación en competencias clave nivel 2 e nivel 3: ten como obxectivo que aquelas persoas que desexen contar cunha vía para poder realizar en Galicia accións formativas conducentes a certificados profesionais para así non ter que agardar a ter homologados os seus estudos poidan realizar esta formación no seu país de orixe a través dos recursos formativos dispoñibles no campus virtual da Consellería de Emprego, Comercio e Emigración, coa posibilidade de realizar as probas de superación que lles permitan obter a certificación de ter superadas as competencias clave de nivel 2 ou de nivel 3.

A actuación no que atinxe a esta formación por parte da entidade beneficiaria consistirá en difundir entre a poboación interesada a posibilidade de acceder de xeito libre e gratuíto aos contidos formativos que están dispoñibles no campus virtual da Consellería e que conta, ademais, cun servizo de titorización.

b.2) Accións formativas relacionadas co sector produtivo e posto de traballo ofertado pola empresa, xa que terá como obxectivo reforzar a capacitación profesional da persoa permitíndolle adquirir, actualizar, reciclar e completar o perfil de competencias profesionais axeitados a ese posto de traballo que se lle oferte.

b.3) Competencias dixitais: desenvolvemento das destrezas necesarias para empregar as TIC como ferramenta no ámbito laboral (creación de correo electrónico, uso de navegadores da internet…).

b.4) Habilidades brandas (traballo colaborativo e en equipo, comunicación, negociación, xestión do estrés, creatividade, capacidade de adaptación, flexibilidade, actitudes...).

No que atinxe á formación das epígrfes b.2+b.3+b.4, o número máximo de horas impartidas das ditas epígrafes por participante non poderá superar en total as 100, coa distribución desas horas entre bloques que se considere axeitada en función do perfil da persoa participante.

As accións de formación e cualificación que conteña o plan individualizado poderán ser realizadas pola persoa con carácter previo ao seu traslado a Galicia para ocupar o posto de traballo ofertado, ou unha vez estea xa incorporado ao dito posto de traballo.

3. Eixe Contratación

Este eixe ten como finalidade procurar a inserción laboral das persoas participantes e supón a realización dos trámites necesarios para a formalización do contrato de traballo ofertado por unha empresa das que teñan subscrito coa entidade beneficiaria un compromiso de contratación das persoas participantes no Programa Retorna Cualifica Emprego.

Por cada inserción laboral que se axuste aos requisitos establecidos nesta Orde, a entidade beneficiaria percibirá 1.980 euros.

Este eixe comprenderá as seguintes actuacións:

a) A entidade beneficiaria deberá contar co compromiso de contratación por parte de empresas que dispoñan de ofertas de emprego en Galicia susceptibles de ser ocupadas por persoas participantes no Programa Retorna Cualifica Emprego, e reservándose as empresas a realización dos seus procesos habituais de selección. No documento que formalice o compromiso deberá reflectirse información sobre perfís das persoas que se van contratar, descrición dos postos que se van cubrir, número de persoas para contratar, xornada e localización do centro de traballo.

En todo caso, a modalidade de contratación será contrato indefinido a tempo completo ou parcial e neste caso deberá ser, como mínimo, equivalente á media xornada dun/dunha traballador/a a tempo completo.

Coa presentación da solicitude de subvención as entidades deberán presentar a totalidade do número de compromisos de contratación a que se fai referencia na epígrafe 3.a) anterior, tendo en conta que o requisito mínimo para poder presentarse á presente convocatoria é de, polo menos, 40 compromisos de contratación.

b) Realización e/ou acompañamento, se é o caso, ás persoas seleccionadas para formalizar o contrato de traballo para tramitar todas as xestións necesarias para trasladarse a Galicia (expedición de documentos de viaxe necesarios, incluídos os billetes de traslado). Neste sentido, a entidade beneficiaria deberá informar por escrito as persoas das condicións (dereitos e obrigas) que implica a participación no programa e, sobre todo, das condicións da contratación que se lles ofrece, con carácter previo en todo caso á súa aceptación e traslado a Galicia.

c) Coordinación e seguimento coa empresa que oferta o posto de traballo ao respecto dos trámites que esta debe realizar para levar a cabo a contratación e que pode implicar que a empresa teña que solicitar directamente na área funcional de traballo e inmigración (oficinas de estranxeiría), as correspondentes autorizacións de residencia temporal e traballo por conta allea de duración determinada, cando sexa o caso.

d) Comprobación final previa ao traslado da persoa de que dispón de toda a documentación e permisos necesarios e en regra para poder trasladarse a Galicia e desenvolver o posto de traballo conforme a normativa vixente que sexa de aplicación.

e) Aboamento ás persoas que formalicen un contrato de traballo dunha axuda económica de 1.400 euros para cubrir os primeiros gastos de instalación en Galicia (alimentación, produtos hixiene, transportes diarios...). Este importe poderá ser aboado en dous pagamentos, segundo o considere a entidade beneficiaria á vista das circunstancias da persoa, de xeito que poderá aboarse un primeiro pagamento de 600 euros coa formalización do precontrato e un segundo pagamento de 800 euros coa formalización do contrato de traballo.

f) Aboamento ás persoas que formalicen un contrato de traballo e precisen de xeito inmediato formalizar un contrato de alugamento de vivenda, dun complemento económico de ata 1.800 euros para os efectos de atender as obrigas derivadas da constitución de fianza e da alta en subministracións (luz, auga etc.); así mesmo, a entidade beneficiaria prestará información e asesoramento para que poidan acadar un aloxamento en réxime de alugamento ou por outras vías.

g) Aboamento ás persoas que formalicen un contrato de traballo dunha axuda para facilitar o acceso a unha vivenda en alugamento. O importe desta axuda será de 600 euros durante 3 meses como máximo e proporcional ao tempo que permaneza no programa. En casos excepcionais debidamente xustificados e con autorización previa da consellería, o dito importe poderá destinarse a sufragar os gastos de aloxamento noutro tipo de residencia por un tempo máximo de 3 meses. En todo caso, as entidades beneficiarias deberán facilitar información á consellería sobre o acceso á vivenda das persoas retornadas e, para estes efectos, deberán requirirlles a estas persoas a documentación xustificativa pertinente.

h) Seguimento e acompañamento das persoas contratadas desde o inicio da súa relación laboral ata a finalización do programa e que poderá realizarse por distintos medios (teléfono, correo electrónico, videoconferencia, etc.) pero da que deberá quedar constancia mediante documentación acreditativa que permita comprobar que se realizou ese seguimento e acompañamento.

Presentación de solicitudes

As entidades que así o desexen poderán presentar a súa solicitude obrigatoriamente por medios electrónicos a través do formulario normalizado (anexo I), dispoñible na sede electrónica da Xunta de Galicia, á que se pode acceder no seguinte enlace.

Acceso Sede Electrónica TR380A

Esta obrigación de presentación electrónica mantense durante toda a tramitación do expediente.

As entidades beneficiarias realizarán as seguintes declaracións responsables, empregando para o efecto o formulario do anexo I:

a) Relación doutras axudas concedidas ou solicitadas para o mesmo proxecto ou conceptos obxecto de solicitude.

b) A veracidade de todos os datos contidos na solicitude e nos documentos que se achegan.

c) Non estar incursa en ningunha das circunstancias previstas no artigo 13.2 da Lei 38/2003, do 17 de novembro, xeral de subvencións.

d) Non estar incursa en ningunha clase de inhabilitación para a obtención de axudas previstas nos números 2 e 3 do artigo 10 da Lei 9/2007, do 13 de xuño, de subvencións de Galicia.

e) Estar ao día nas obrigas por reintegro de subvencións, conforme o artigo 10.2.g) da Lei 9/2007, do 13 de xuño, de subvencións de Galicia, e o artigo 9 do Regulamento de subvencións de Galicia, aprobado polo Decreto 11/2009, do 8 de xaneiro, polo que se aproba o Regulamento da Lei 9/2007, do 13 de xuño, de subvencións de Galicia, e de reembolso de préstamos ou anticipos concedidos con cargo aos orzamentos xerais da Comunidade Autónoma.

f) Que a entidade solicitante coñece que as persoas ou empresas provedoras non poderán estar asociadas nin vinculadas coa entidade solicitante ou cos seus órganos directivos ou xestores, e que non concorren neles ningunha das prohibicións recollidas no artigo 27.7 da Lei 9/2007, de subvenciones de Galicia, nin no artigo 43 do Regulamento que desenvolve a dita lei, aprobado polo Decreto 11/2009, do 8 de xaneiro, tendo en conta, ademais, o disposto no Regulamento (UE) nº 651/2014 sobre empresas vinculadas.

g) Ter a capacidade administrativa, financeira e operativa para cumprir os obxectivos da actuación para a cal se solicita a axuda.

h) Manter un sistema de contabilidade separada ou un código contable axeitado en relación con toda as transaccións relacionadas cos gastos subvencionados, sen prexuízo das normas xerais da contabilidade, que permita seguir unha pista de auditoría suficiente sobre os gastos financiados.

i) Asumir a aplicación de medidas antifraude eficaces e proporcionadas no seu ámbito de xestión, así como a obriga de comunicar ao órgano xestor os casos de sospeita de fraude.

j) Cumprir a normativa comunitaria, estatal e autonómica de aplicación, en particular, a normativa en materia de subvencións e contratación pública, cando proceda.

k) Estar ao día nas súas obrigas coa Axencia Estatal da Administración Tributaria, coa Comunidade Autónoma de Galicia e coa Seguridade Social.

l) Cumprir os requisitos establecidos no artigo 6 da Orde, sen prexuízo da súa verificación ou acreditación posterior.

Documentación complementaria

As entidades interesadas deberán achegar xunto coa solicitude da axuda (anexo I) a seguinte documentación: a) Escritura de constitución e/ou modificación.

b) Poderes acreditativos da representación da persoa que asina a solicitude de participación.

c) Proposta técnica.

d) Descrición dos recursos humanos destinados ao programa indicando as titulacións académicas e as funcións que se van desenvolver.

e) Declaración dos recursos materiais e instalacións de que dispoña a entidade para a realización do programa.

f) Compromisos de contratación por parte de empresas que dispoñan de ofertas de emprego en Galicia susceptibles de seren ocupadas por persoas participantes no Programa Retorna Cualifica Emprego, tendo en conta o disposto no artigo 6.1.b.2.i) da presente orde no que atinxe ao número mínimo de compromisos exixibles para poder participar na presente convocatoria.

g) Calquera outra documentación que a entidade solicitante considere de interese en relación co obxecto da subvención.

Documentación para a xestión do Programa

Nesta sección iranse publicando, a medida que vaian sendo necesarios, aqueles modelos de documentación que haberán de ir cumprimentando as entidades xestoras beneficiarias do programa.

Solicitude de anticipo

Para rematar, afondando na información para este tipo de entidades, a través do seguinte botón pódese acceder á infografía informativa realizada:

Infografía informativa

A Consellería de Emprego, Comercio e Emigración, dentro da súa proposta de achega de valor ás empresas e entidades que están a buscar persoas candidatas para os procesos de selección que teñan abertos en cada momento, pon en marcha unha canle de colaboración a través dun sistema para dar a máxima difusión das ofertas de emprego promovidas por aquelas.

Esta canle, materializado a través da sinatura dun protocolo de adhesión ao sistema de difusión de ofertas de emprego do Servizo Público de Emprego de Galicia, achega ás entidades e empresas empregadoras a posibilidade de aunar esforzos e aumentar as canles de información para atopar candidaturas que cumpran cos requirimentos das entidades oferentes, utilizando tanto a rede de oficinas de emprego de toda a comunidade autónoma, como as canles propias do portal de emprego da Consellería, do portal Empléate do Sistema Nacional de Emprego e do portal EURES da Unión Europea.

Trátase con elo de que todas as ofertas de emprego que se promovan en Galicia conten coa máxima difusión e capacidade de visibilidade para que ninguna quede baleira e sen candidaturas, facilitando o desenvolvemento das persoas traballadoras e aumentando o número de persoas ocupadas no seu ámbito.

Ao mesmo tempo, a Consellería porá tamén ao servizo da súa difusión as Intranets da rede de oficinas de emprego e do Servizo de Orientación Laboral, así como a rede social LinkedIN, comprometéndose en todo caso a pór a súa disposición todos os seus recursos persoais, materiais e tecnolóxicos para obter candidaturas axustadas aos postos de traballo ofertados.

Por outra banda, a entidade debe comprometerse a promover a achega de ofertas de emprego ao Servizo Público de Emprego de Galicia e a dar a correspondente información sobre o estado das mesmas para que os contidos e postos difundidos estean sempre actualizados.

Para participar nesta iniciativa, a entidade deberá cubrir o seguinte formulario e, trala súa verificación, proceder á sinatura do protocolo de adhesión como o modelo que se achega tamén a continuación.

Formulario de adhesión

Modelo do protocolo de adhesión

O Programa Bono Talento Empresa é unha liña de axudas da Consellería de Emprego, Comercio e Emigración destinado a apoiar proxectos de formación non formal mediante a realización de accións formativas de curta duración (entre 16 e 100 horas) que teñan como obxectivo mellorar as capacidades das empresas e contribuír ao desenvolvemento profesional dos seus cadros de persoal dos centros de traballo en Galicia, onde se deberán desenvolver as actividades subvencionadas.

Persoas beneficiarias

As entidades que poden ser beneficiarias destas axudas son:

Microempresas, pequenas e medianas empresas (PEMES) e grandes empresas validamente constituídas e con actividade ininterrompida, cando menos, dende tres anos antes da data de publicación da convocatoria desta axuda.

Persoas traballadoras autónomas que teñan contratadas ao seu cargo a persoas traballadoras por conta allea, inscritas no Réxime Especial de Traballadores Autónomos ou no Réxime Especial de Traballadores do Mar por conta propia, cunha antigüidade como cotizante igual ou superior a tres anos ininterrompidos inmediatamente anteriores á data de publicación da convocatoria desta axuda.

Accións formativas subvencionables

As accións formativas deben ser en modalidade presencial, podendo impartirse mediante aula virtual a través do Campus Virtual de Formación para o Emprego, e orientarse á adquisición de competencias nos ámbitos de capacitación detectados como prioritarios no marco da Axenda Galega de Capacidades para o Emprego:

Competencias dixitais, dende a dixitalización básica, ata a adquisición de competencias e coñecementos técnicos avanzados e a adquisición de coñecementos de tecnoloxías innovadoras ou disruptivas, etc.

Competencias do ámbito asistencial, na prestación de coidados (asistencia a persoas enfermas, con problemas de mobilidade e a maiores, entre outros), técnicas e coñecementos sanitarios, de diagnóstico ou de medicina preventiva ou de benestar entre outros.

Competencias en procesos industriais na manipulación de maquinaria especializada, coñecementos e técnicas da construción, técnicas de soldadura, instalación de compoñentes, deseño ouinterpretación de documentación ou diagramas técnicos, etc.

Competencias vinculadas á xestión empresarial, xestión de persoas e equipos (RR.HH. e xestión do talento, xestión de proxectos, etc.), xestión eficiente dos recursos, toma de decisións, planificación estratéxica ou a realización de tarefas administrativas,financeiras e contables, etc.

Competencias de prestación de servizos a clientes, tanto vinculadas a promocionar,
vender e comprar produtos ou servizos como relativas á atención ao cliente (orientación e asesoramento, satisfacción do cliente, asistencia postventa, xestión de reclamacións, etc.) e á atención telefónica.

As accións solicitadas non deben atoparse incluídas na oferta de formación recollida no Catálogo de Especialidades Formativas do Servizo Público de Emprego Estatal (SEPE), que se pode consultar a través do seguinte enlace:

Buscador Catálogo

O proxecto formativo estará integrado por un máximo de tres accións formativas, presentando un anexo II por cada unha delas, detallando entre outros: obxectivos, contidos, duración, perfil das persoas participantes e das docentes, calendario, probas de coñecementos e criterios de valoración.

Prazo de solicitude da axuda

O prazo para solicitar a axuda é do 26 de xuño ao 16 de setembro de 2024.

Prazo de execución das accións formativas

O prazo para executar as accións formativas será o seguinte:

Accións a desenvolver só no 2024: Deberanse realizar entre o día seguinte da publicación desta axuda e o 15 de novembro de 2024.

Accións a desenvolver no 2024 e 2025 ou só no 2025: Poderanse realizar desde o 16 de novembro de 2024 ata o 30 de setembro de 2025.

Contía da subvención

Atendendo á tipoloxía da actividade subvencionable a contía da subvención determinarase e cuantificarase a través de módulos, resultado da suma de:

16,70 €/hora de formación polo nº de persoas asalariadas da entidade beneficiaria que realicen a acción formativa.

17,93 €/hora de formación para cubrir o salario aboado ás persoas asalariadas polo número de persoas asalariadas da entidade solicitante que participen na acción.

O gasto máximo subvencionable será a suma dos gastos máximos subvencionables das accións formativas que o comprenden.

A intensidade máxima da axuda estará limitada ao 70% dos custos subvencionables para as micro e pequenas empresas, ao 60% para as medianas empresas e o 50% para as grandes empresas.

A contía máxima de subvención é de 25.000€ por persoa solicitante.

Para máis información, no seguinte enlace se pode acceder á páxina web dos Bonos Talento Empresa dentro do Portal da Consellería de Emprego, Comercio e Emigración:

Páxina web Bonos Talento Empresa

Por último, para completar a información anterior, acompáñase unha infografía resumo para facilitar a súa comprensión.

Infografía resumo

PROGRAMA RETORNA CUALIFICA 2025 - EMPRESAS